வேட்டையன் OTT -யில் வௌியாகும் திகதி அறிவிப்பு

Colombo (News 1st) திரையரங்குகளில் வெளியாகும் படங்களுக்கு இரசிகர்கள் மத்தியில் எப்படி வரவேற்பு கிடைக்கின்றதோ அதேபோன்று OTT தளங்களில் வெளியாகும் திரைப்படங்களுக்கும் ஏராளமான இரசிகர்கள் உள்ளனர்.

இந்த வாரம் தீபாவளியை முன்னிட்டு திரையரங்குகளில் அமரன், பிரதர், மற்றும் ப்ளடி பெகர் உள்ளிட்ட 3 தமிழ் திரைப்படங்கள் வெளியாகி இரசிகர்கள் மத்தியில் நல்ல வரவேற்பை பெற்று வரும் நிலையில் நவம்பர் மாதம் OTT-யில் வெளியாகவிருக்கும் திரைப்படங்களுக்காக ஏராளமான இரசிகர்கள் காத்திருக்கின்றனர்.

அந்த வகையில் சூப்பர் ஸ்டார் ரஜினிகாந்தின் 'வேட்டையன்' திரைப்படம் இந்த வாரம் OTT-யில் வெளியாக உள்ளதாக அறிவிக்கப்பட்டுள்ளது. 

ரஜினிகாந்த் - அமிதாப் பச்சன் இருவரும் சுமார் 33 வருடங்களுக்கு பின்னர் ஒன்றாக இணைந்து நடித்திருந்த 'வேட்டையன்' திரைப்படத்தை 'ஜெய் பீம்' புகழ் இயக்குனர் D.J.ஞானவேல் இயக்கியிருந்தார்.

இந்த படத்தில் மஞ்சு வாரியர், பகத் பாசில், ராணா, துஷாரா விஜயன், ரித்திகா சிங், அபிராமி உள்ளிட்ட பலர் முக்கிய கதாபாத்திரத்தில் நடித்திருந்தனர்.

தமிழ், தெலுங்கு, மலையாளம், கன்னடம் மற்றும் ஹிந்தி என மொத்தம் 5 மொழிகளில் வெளியாகி இரசிகர்கள் மத்தியில் நல்ல வரவேற்பை பெற்ற இந்த திரைப்படம் அமேசான் பிரைம்(Amazon Prime) OTT தளத்தில் எதிர்வரும் 8ஆம் திகதி வெளியாகவுள்ளது.